Græðgissetur á Veiðilæk

Sumarbústaður Sigurðar Einarssonar, sem er í byggingu á Veiðilæk í Norðurárdal, liggur undir skemmdum.  Vinna hefur legið niðri um nokkurt skeið og enginn veit hvað/hvort eitthvað verður að gert.  Þarna eru mikil verðmæti sem farið gætu forgörðum ef ekki verður gripið í taumana. 

Sigurður er sennilega ekki í aðstöðu til að gera neitt í þessu eins og hans mál virðast standa.  Mér datt í hug fyrir nokkru að þarna væri verkefni fyrir íslensku þjóðina.  Að taka við þessu stórhýsi og byggja upp Græðgissetur. 

Minjasetur um íslenska auðmenn og bankamenn og aðra sem hruninu mikla tengjast og voru þess valdandi.  Í húsinu gætu verið vaxmyndir af auðmönnunum, tónlist tengd viðburðum sem þeir stofnuðu til.  Sögur í máli og myndum um þeirra gjörðir. Menn gætu staldrað við vaxmynd af tilteknum auðmanni og ýtt á takka sem gefur samband við myndband og annað sem veitir upplýsingar í máli og myndum. 

Tónlist Elton Johns t.d. gæti verið sem "lyftutónlist" í bakgrunni og drunur í þotum af og til.  Líka mætti láta myndband rúlla þar sem sýnd eru hús og fyrirtæki sem tengjast þessum svikahröppum og þar koma fram upplýsingar um hvernig þeir  tæmdu fyrirtækin og komu sér og sínu illa fengna fé fyrir í dótabúðum og öðrum búðum og fyrirtækjum í útlöndum.  Og á eyjum eins og Tortola.  Via Luxemborg.

Græðgissetrið gæti verið í tengslum við Landnámssetrið í Borgarnesi því þar er hæfileikaríkt fólk, sem gæti auðveldlega byggt upp áhrifamiklar leiksýningar um hvernig græðgin fer með menn og veldur heilli þjóð ósegjanlegri kvöl, skömm og pínu.

Borgfirðingar fengju verkefni að vinna að og ferðamenn kæmu frá öllum heimshornum til að skoða þessa einstöku sýningu á því sem við landarnir fengum að kenna á og skall á okkur haustið 2008.

 

 

Athugasemdir

[Gísli Gunnlaugsson (IP-tala skráð) 27.2.2009 kl. 18:54]

frábær hugmynd! 

[Auður Matthíasdóttir, 27.2.2009 kl. 19:18]

Þakka þér fyrir, Gísli.  Þetta er vel framkvæmanlegt ( kannski ekki endilega í húsinu hans Sigurðar ) og væri smyrsl á sárið fyrir okkur þjóðina.  Og  slíkt minjasafn væri  til aðvörunar   komandi kynslóðum.  Og svo eru margar úfærslur sem hægt væri að leika sér með!  Ég sá í DV í dag að þeir höfðu tekið hugmyndina og gert að sinni (svarthöfði).  Kær kveðja!

[Jóhann (IP-tala skráð) 1.3.2009 kl. 18:24]

Setrið heitir Veiðilækur ekki Fiskilækur

[Auður Matthíasdóttir, 2.3.2009 kl. 12:08]

Jóhann!  Þakka þér kærlega fyrir ábendinguna.  Hef þegar leiðrétta þetta.