Ríkistjórn sem ekki gerir nokkurt gagn

Undarlegt ástand ríkisstjórnar Íslands.

Dauðastríð sem hefur varað alltof lengi.

Nú hafa þrír þingmenn hennar reynt sitt til að enda þetta sorglega ástand.

Ekkert raunverulegt er tekið til umfjöllunar.  Menn eru sárir og geta ekki unnið með þessum og hinum.

En að horfast í augu við endalok ríkisstjórnarinnar er of mikið.

Er ekki mál að linni.

Sorgarferlið er þegar hafið hjá heitustu stuðningsmönnum.

Vertu sæl Íslands sárasta tilraun.  Hrein vinstri stjórn.  Æ Æ Æ

Afar sorgleg reynsla. 

Ekkert var hótinu betra en hjá hinum. 

Það er raunverulega lygilegt hve lítill munur er.

Nema ef eitthvað er,  þá eru þetta meiri klaufar á öllum sviðum.

Nýi brandarinn er vegatollar!

Þvílík vanhugsuð vitleysa.

Örvænting er allt sem segja má um þessa (Ó) stjórn... 

Fórnarlömb

Leiðrétting skulda vegna forsendubrests  ætlar að vefjast fyrir þeim sem að því eiga að vinna.

Flestir virðast óánægðir með þær lausnir sem liggja fyrir.

Guðmundur Ragnarsson, formaður Félags vélstjóra og málmtæknimanna, skrifar í pistli sínum:

 " Stærsti vandinn í að finna lausn á skuldavanda heimilinna í þessum aðgerðum var sennilega að nokkuð stór hópur af þeim sem verst eru staddir í skuldavandanum, voru farnir á hausinn eða stefndu í greiðsluþrot 2007 til 2008 vegna óhóflegrar skuldsetningar, þó ekkert bankahrun hefði komið til."

Af einhverjum ástæðum var þessu fólki haldið á floti og það ber að skoða betur.  Ekki er hægt að slá því föstu að allir þessir væru farnir á hausinn hvort sem væri.

Ég spyr enn og aftur hvers vegna lántakendur sem tóku lán í góðri trú og höfðu fengið leiðbeiningar fjármálaráðgjafa bankana.  skoðað vel sín fjármál og möguleika að standa skil.  Já hvers vegna eiga þeir að borga ósanngjarnar upphæðir og  vexti sem þeir hefðu aldrei samið um á sínum tíma? 

Þetta fólk er gert að fórnarlömbum í þessum þrengingum. 

Og á sama tíma eru afskrifaðar milljarðasummur glæpabarónanna og þeir fá fyrirtæki "sín" á silfurfati. Og sumir þeirra halda  nú áfram  byggingu ofvaxinna sumarhúsa, sem látin var hvíla um stund.

Sjúk börn í sjúku þjóðfélagi

Slowly but surely they are getting nowhere.

Jamm þetta á við hvað?  Jú auðvitað samningana um Skjaldborgina. 

Eða hvaða skuldir á a fella niður og hvaða skuldir skal innheimta hvað sem á gengur?

Mér sýndist taka sig upp bros á ásjónu forsætisráðherra í viðtali  í kvöld.  Jú,  Jóhanna  taldi að svarið ætti að liggja fyrir á morgun!  Þetta bros  er svo óvenjulegt að ég hneigist til þess að trúa að eitthvað nýtt sé í vændum.  Eitthvað brosvænt.

Veik börn

Hvað á að gerast hér í þjóðfélaginu?  Horfði á útsendingu þar sem litill drengur fársjúkur var sýndur og okkur greint frá því að nú ætti hann ekki að fá hjálp framvegis frá Heimahjúkrun.  Það vantar tilteknar milljónir til þess að mögulegt sé að veita honum og öðrum börnum í hans stöðu þá umönnun og hjúkrun heima sem hann/þau  þarfnast.

Hann þarf því að leggjast inn á spítala.  Sparnaðurinn er ekki i höfn.  Eins og svo oft áður er dæmið ekki reiknað af kunnáttu og samviskusemi.  Bara klárað í hvelli og svona er þetta bara!

Ég bið ykkur afsökunar sem eruð glöð og ánægð með  að 25 manneskjur fái  þingmannslaun á svokölluðu stjórnlagagaþingi í a.m.k. 3 mánuði.  Það eru miklir peningar sem þar fjúka. Og strangt til tekið  er alls engin sérstök þörf á því.  Mætti hugsa þetta mál betur og vinna betur.

Mér þætti þessum penginum betur varið  til annarra hluta.  Eins og t.d. að veita langveikum  börnum og fölskyldum þeirra þá aðstoð sem þau þarfnast.  Það er komin tuttugu ára reynsla fagfólks á vinnuna með þessum hjartans börnum og góðvild og áhugi er ekki reiknaður til tekna.

Óska þess svo sannarlega að hér verði betur skoðað hvað rétt er og rangt.

Og vil ennfremur taka fram að peningar sem áætlað er að veita í stjórnlagaþing eru að mínu mati enn eitt dæmið um vitleysisgang núverandi ríkisstjórnar.

Kjánaháttur hverra?

Lokið er leik með almenning um svokallaða stjórnlagaþing, þar sem velja átti "þingmenn".

Þessi barnaskapur kostar morð fjár. Sorgleg notkun á peningum sem ekki er of mikið af nú um stundir.

Frambjóðendur eru misánægðir með úrslit og kjörsókn.

Sumar tala um fífl sem ekki mættu til að kjósa og um  gáfnafar landana Þeim væri ofviða þetta flókna kosningakerfi

Hverrra er hrokinn og yfirlætið?

Hvort sem mönnum líkar það vel eða illa var hér einfaldlega um illa undirbúna og vanhugsaða framkvæmd að ræða. 

Ekki gerir það málið betra að gagnrýna þá sem ekki notuðu kosningarétt sinn.

Voru þeir ekki að segja skoðun sína á þessu sérkennilega kalla eftir atkvæðum.  Sem var óheyrilega illa skilgreint og lítill tíma gefinn til að vinna betur.

 

 

Er íslenskt þjóðfélag svikamylla?

Hvað er í gangi í okkar smáa þjóðfélagi?

Hvers vegna gengur ekki að finna góða leið til að hjálpa heimilunum í landinu?

Er það vegna þess að bankar og lánastofnanir þola ekki slíkt högg sem það væri ef allir fá t.d. sömu upphæð eftirgefna.

Af hverju er í lagi að almenningur fái högg en ekki bankar og slíkir?

Hvers vegna starfa bankarnir eins og þeir hafa ekki lært nokkurn skapaðan hlut af hruninu?

Hvers vegna gefa þessir bankar eftir milljarða til bjargar "auðmönnum" en þjarma að almennum skuldurum sem þó skulda brotabrot af því sem gefið er eftir til þessa fólks.

Hvers vegna fá menn eins og t.d. Jóhannes áður kenndur við Bónus að búa óáreittur í húsi sem hann á ekki en skuldsett upp í rjáfur. Og kaupa að sögn fyrirtæki í Færeyjum svo eitthvað sé nefnt.

Hvers vegna getur mamma skuldsett til dauðadags keypt hús af syni sínum og eiginkona keypt fjallahöll af manni sínum án þess að menn blási úr nös? Hmmm kannski einhver blási í nös...

Hvers vegna getur maður haldið áfram að reka World Class án þess að eiga fyrir því?

Hvernig er hægt að éta pizzafyrirtæki innanfrá þegar svona mikill matur er á boðstólum?

Hvers vegna í ósköpunum er unað við það að fólk standi í biðröðum til að fá mat?

Hvar er velferðarstjórnin stödd?  Í skýjunum á hraðri leið til einskis..

Hvers vegna er verið að undirbúa byggingu glæsisjúkrahúss á meðan niðurskurður stefnir heibrigðiskerfi okkar í stórhættu? Öll skynsemi segir okkur að smáu sjukrahúsinu eru algjörlega nauðsynleg og veita sjúklingum öryggi.

Bygging Hörpu svokölluðu er frábært dæmi um undarlega ráðstöfun á fjármunum þegar almenn skynsemi segir að það verði að bíða betri tíma.

Eða vilja ekki landsmenn öryggi í heilbrigðisþjónustu?

Og mennun ungviðisins í góðum farvegi en ekki  niðurskurðar sem leiðir til ills.

Hvers vegna er Landeyjahöfn yfirleitt til?  Ef hún er þá til?   Nógu margir bentu á hve arfavitlaus þessi staðsetning væri. Og nú moka menn sandi eins og ekkert sé sjálfsagðra já og ætla að breyta farvegi Markarfljóts til að "redda" málinu.

Skattar og álögur eru að sliga okkur og samt er ekkert lát þar á.  Eygi fjármálaráðherra einhverja summu sama hve smá hún er t.d. hjá ellilífeyrisþegum þá er allt gert til að ná henni.

Fals stjórnvalda þegar rætt er um aðild að ESB er hræðilegur skrípaleikur. Og þvílíkt rugl.

Gæti bent á  kosningu til stjórnlagaþings sem dæmi um enn eina hringavitleysuna.

Við höfum 63 þingmenn á alveg þokkalegum launum.   Úr þeim hópi ætti að vera hægt að setja nokkra í þetta verkefni og það fyrir miklu minni peninga  en þessi óráðsía kostar okkur.  Það eru til margar og flottar aðferðir til að virkja almenning sem eru  betri en þessi rándýra  og kjánalega aðferð.

Er kannski verið að láta almenning hafa eitthvað fyrir stafni til að horft sé frá allri hringavitleysunni?

Mikið erum við heppin að eiga þetta frábæra land/eyju að föðurlandi.  Kostirnir við að eiga hér heima eru svo margir. Þess vegna eigum við að gera kröfu til þess að fá viti borna stjórnun á hlutunum og almenna tiltekt í þeim stofnunum sem glatað hafa trausti almennings. 

Það er brýnt að nú fari að rofa til í allrr þeirri ringulreið sem hér ríkir. 

Óskandi er að þjóðin fái stjórn sem stendur sig. 

Og það sem fyrst.

 

Marinó hættir?

Maínó G. Njálsson ætlar að hætta.  Málsvarinn besti.  Maðurinn sem hefur haldið uppi merkjum heimilana í landinu.  Skuldum vafin og illa stödd heimili fólks sem  vissi ekki betur en það væri að taka lán sem stæðist.  Alllar forsendur góðar og fólkið í vinnu og með ágæt laun. 

Sprengjan sprakk með þekktum afleiðingum.  Margir urðu atvinnnulausir.  Lán hækkuðu upp úr öllu valdi. Sumir neyddust til  að gefast upp.  Og jafnvel flúðu land.

Ég spyr enn og aftur:  Hvers vegna þurfa bara lántakendur að súpa seyðið af þessu hruni?  Hvers vegna þarf þetta tjón að vera einhliða?  Hvers vegna taka  ekki lánafyrirtæki sinn skerf til móts við skuldunautana?

Hvað er í gangi í bönkum þessa lands? Í lánafyrirtækjum ? Í ríkisstjórninni?  Hér á reiki er margur óhreinn andinn.   Vondar verur?  Sem þola ekki dagsins ljós?

Hvers vegna er nánast ráðist að Marinó með afskiptum af fjármálum hans  og hans konu?  Hvað er á bak við þetta?  Hverjir þola ekki hve einarðlega og af miklum drengskap Marinó hefur starfað fyrir málstaðinn?

Hver hefur algjörlega hreint borð á allan máta?  Eða sá yðar sem syndlaus er kasti fyrsta steininum.

Lára Hanna Einarsdóttir hefur mátt gangast undir mikið óréttlæti  Sú góða og eldklára kona hefur starfað af miklum krafti við að upplýsa okkur um  gang mála og svik og pretti hinna svokölluðu auðmanna og hirðar þeirra. 

Ég get ekki annað en nefnt Láru Hönnu í sömu andránni og Marinó.  Þessar manneskjur hafa báðar verið frábær stuðningur við fólkið í landinu og ber að þakka þeim en ekki koma fram á svo ómaklegan hátt sem gert er.

Ekki hætta kæri Marinó.  Við styðjum þig til góðra verka

Fallegt haust en vondur veruleiki á Íslandi

Veður hefur verið einstaklega gott það sem af er hausti.  Helgina 9.-10. október var hreinlega alveg dásamlega fallegt um allt land, ekki síst á Vestfjörðum.  Logn,  blíða og frábærilega fagrir litir í hverjum firði fyrir vestan.

Var þar á ferð mér til ósegjanlega mikillar ánægju.  Notaði myndavélina hvenær sem tækifæri gafst og naut fegurðar fjalla og gróðurs, lands og láðar bæði gegnum linsuna og gleraugun!

Já lífið er frábært á slíkum dögum.

Það er þó öllu dekkri mynd sem blasir við þjóðinni þessa dagana. 

Ríkisstjórn sem er vita gagnlaus hangir enn á fjósbitanum.  Veit ekki hvernig þau fara að því ekki hjálpast þau að.  Hver höndin er uppi á móti annarri.

Fyrir liggur að rústa heilbrigðiskerfi okkar Íslendinga.  Það er sennilega einstakt hve illa er staðið að þessum tillögum um sparnað í heilbrigðisþjónustu okkar.  Og einmitt þegar mest liggur á að vinna skynsamlega og  skoða allar hliðar og alla möguleika, afleiðingar,  kosti sem galla þá hefur verið valtað yfir heilbrigða skynsemi og samráð við þá sem besta þekkja til.  Þeir hafa  ekki fengið að koma að þessum málum nema í mýflugumynd og varla það.

Eru starfsmenn ráðuneytisins orðnir svo mosagrónir og illa að sér að þeim er hulið það við hin sjáum.  Já það sem hrópar á okkur.  Að ég tala ekki um valdhafa og svokallaða aðstoðarmenn  þeirra.

Mér þætti fróðlegt að sjá það skoðað hve mikið kostar að senda fleiri hundruð manns í atvinnuleysi á móti því sem það kostar að hafa þetta sama fólk áfram í vinnu.  Það er mjög dýrt að tapa mannauði og þekkingu, þjálfun og hæfni í starfi.  Það er afar dýrt að hafa þúsundir landsmanna atvinnulausa með þeim margvíslegum afleiðingum sem það hefur fyrir einstaklinga og fjölskyldur þeirra.

Og einnig er dýrt að missa góða og vandaða þegna úr landi vegna þess að ekki er tekið á erfiðleikum þeirra með sómasamlegum og vitrænum hætti.

Bankar og lánafyrirtæki eiga stóran þátt í uppgjöf margra, sem flúið hafa landið og eru að flýja.

Er ekki skammtíma hugsanaháttur alltof ríkjandi.  Þarf ekki að líta til lengri tíma.  Við megum ekki við því að missa fjölda manns úr landi.  Og ekki megum við láta fleiri manns verða gjaldþrota.  Það er dýrkeypt, ekki aðeins fyrir viðkomandi heldur líka fyrir samfélagið í heild.

Þá  legg ég til að allir grunaðir fjárglæframenn verði teknir sömu föstu tökum og Baldur ráðuneytisstjóri.  Hann er bara lítið peð miðað við glæponana sem komu okkur í þessa hörmulegu stöðu.  Þá  þrjóta átti að setja " med det samme" bak við lás og slá með stöðu grunaðs mann.  Og koma þar með í veg fyrir að þeim tækist að flytja fé úr landi í tonnavís.

Áfram Ísland!

Lífið í landinu

Haustið færist yfir land og þjóð.  Það er afskaplega margt í gangi í þjóðfélaginu núna. 

Á að kæra fyrrrv. ráðherra eða ekki?

Er það trúverðugt að niðurstaða nefndar er þríklofin?  Pólitískt en  ekki málefnalega,  nota bene!

Er svokölluð ríkisstjórn hæf  sbr. máttleysi þegar dómur í myntkörfuláni féll.  Engin viðbrögð voru til staðar eins og Bjarni Benediktsson formaður Sjalla segir réttilega.  Ekki einu einni plan A hvað þá plan B.

Erum við í aðlögun að ESB án þess að vita það?

Eru bankarnir enn að svindla og pretta?  Hvers vegna er Arion banki með leikaraskap í máli Bónusfeðga?

Hvers vegna eru heilu fjölskyldurnar bornar út úr híbýlum sínum án nokkurrar miskunnar en milljarðar afskrifaðir hjá svokölluðum auðmönnum?

Hvers vegna eru bæði Þorgerður Katrín og Guðlaugur Þór á Þingi?

Og mál málanna:  Níðingsskapur gangvart börnum virðist stórþrífast í samfélaginu.  Prestar eiga leik aftur og aftur.  Nú síðast var það "Engillinn" Helgi Hróbjartsson prestur og trúboði.

Þetta er hreinlega meiri  háttar áfall.  Biskupsmálið var alveg óskaplega mikið áfall og verst var að dóttir Ólafs Skúlasonar hafði ljóta sögu að segja um sinn eigin föður.  Þvílík sorg.

Hins vegar þykir mér merkilegt hve margir finna hjá sér þörf til að fara til Stigamóta til að létta á hjarta sínu um misnotkun í bernsku þó afar  langt sé  um liðið.  Fólkið orðið aldrað og e.t.v. níðingurinn löngu dáinn.

Ágætur lögmaður sló á létta strengi í öllu þessu og fékk bágt fyrir.  Það þótti mér fremur furðuleg umvöndun.

En áfram alvara.  Maður á áttræðisaldri er dæmur til 2ja ára fangelsisvistar fyrir misnotkun á barnungri stúlku.  Að mörgu leyti er þetta undarlegt mál.  Að fólkið hennar hafi ekki tekið eftir neinu athugaverðu í samskiptum þeirra er undarlegt.  Skv. fréttum af þessu máli greiddi maðurinn t.d. bílpróf fyrir stúlkuna auk þess að gefa henni margar dýrar gjafir. Sambandið stóð yfir í nokkur ár.  Hvar var fólkið hennar eiginleg?  Fannst þeim ekkert athugavert við þetta samband eldri manns við barnunga og honum alls óskylda stúlku.  Hegðun mannsins er auðvitað alveg hræðileg og vont að hugsa til þess hvernig hann misnotaði stúlkubarnið.

Umhverfismálin halda áfram að vera bitbein.  Eyðlegging Dynks og Urriðafoss virðist blasa við.  Allt fyrir álið.  Verkfræðingar hafa reiknað og reiknað fyrir Álverið í Straumsvík og nú skal auka afköstin án þess að stækka kerin og byggingarnar.  Hvers vegna þarf allaf að auka afköst?  Er ekki í lagi að láta þetta malla eins og það er nú?  Hlýtur að hafa borgað sig til þessa.  Annars væri það ekki í gangi.

Húsvíkingar liggja á bæn meðan aðrir óska þess að þar rísi aldrei álver.  Andri Snær skrifaði góða grein og menn rifust.

Sennilega eru menn að fara framúr sjálfum sér þegar verndun lands er í sigtinu.  Að banna umferð hesta um Vonarskarð í Vatnajökulsþjóðgarði er á mörkum þess að vera eðlilegt. Halló fólk!  Hvaða rugl er þetta eiginlega.

Eitt er að veiða og annað ofveiða.  Nú er í tísku að veiða villibráð.  Blaðið Gestgjafinn hefur heldur betur tekið kipp í þessum efnum.  Í ár hafa tvö tölublöð verið helguð þessháttar veiðiskap.  Í öðru blaðinu var dásamað að menn drápu 700 svartfugla og myndir birtar á fjórum síðu blaðsins af "hetjunum".  Og nú nýverið kom út blað þar sem hjón/pör eru hvött til að stunda veiðar saman.  Gott að drepa saman!

Þvílíkur boðskapur!

Hér svigna hillur undir mat og enginn þarf að svelta vegna þess að ekki sé kjöt í boði.  Er ekki betra að láta gæsir, stokkendur, rauðhöfðaendur, urtendur, hávellur og fleiri yndislega fulga fá að vera í friði og lifa lífinu.

Og hjón/pör geta fundið sér spennandi og gefandi verkefni í stað þess að  miða byssu að fallegum og saklausum dýrum. 

Pistli þessum lýk ég með að  óska Vestfirðingum til hamingju með nýju Óshlíðargöngin.  Þar var vel að verki staðið.  Megi gæfan fylgja göngunum og vegfarendum öllum. 

 

Stórlaskað fley flugfreyju

Mannaskipti í ríkisstjórn sem er  a.m.k. í mínum huga fyrir löngu fallin og búin að vera,  eru vonlausir tilburðir til endurbóta.

Núverandi ríkisstjórn er vita gagnlaus og eiginlega meira til óþurftar.

Held bara að aldrei hafi setið ríkisstjórn sem er jafn léleg og þessi núverandi.

Því miður.

Er orðin svo þreytt á þessu bulli og lygum.  Talið um að hafa allt á borðinu og svo gagnsætt er slík blekking að það hálfa væri nóg.

Mannaráðningr eru sérsvið:  Þar hefur Árni Páll skarað framúr í vitleysunni og skömm sé honum.

Já hvernig í ósköpunum stendur á því að Árni Páll lafir innan ríkisstjórnarskjaldborgar?  Hann hefur verið þvílíkt á skjön við alla góða siði að það hálfa væri nóg.

En Skjaldborg þessarrar ríkisstjórnar er svo óskiljanleg að útilokað er að skilja það.

Kannski þarf að skilgreina orðið skjaldborg til að gera núverandi ríkisstjórn grein fyrir því  hvað í því felst.

Eftir þá vinnu vona ég að vð getum brosað og notið lífsins í faðmi nýrrar ríkisstjórnar, sem stendur við orð sín.

Ríkisstjórn góðra gjörða.

Má segja frá vondum gjörðum með von um hjálp?

Enn á ný er uppi umræða um þagnarskyldu. 

Vandinn er hvort virða beri þagnarskyldu eða ekki.

Séra Geir Waageer sjálfum sér samkvæmur:

Enginn millivegur til í þagnarskyldunni sbr. grein hans í Mogga í dag 21. ágúst  2010.: 

Geir segir að þessi ummæli séu með vísan í þá grundvallarhugmynd að prestur hlýði á skriftir í Krists stað. „Presturinn má aldrei gera sig að dómara yfir samvisku annars manns. Hann getur ekki farið að sortera hvers konar leyndarmál eigi að þegja um og hvers konar leyndarmál eigi ekki að þegja um. Hann er hlustandi og á síðan að leiðbeina viðkomandi til þess að taka afleiðingum gjörða sinna."

Bjarni Karlsson.

„Það er háskalegt og varðar hreinan brottrekstur úr prestsembætti að halda fram því sem sr. Geir Waage gerir," segir séra Bjarni Karlsson,sóknarprestur í Laugarneskirkju, um þá skoðun Geirs að þagnarskylda presta gagnvart sóknarbörnum sé algjör og þar sé engan milliveg að finna.Fyrirmæli barnaverndarlaga taka af öll tvímæli um tilkynningaskyldu presta að hún gengur framar ákvæðum laga eða siðareglna um þagnarskyldu. Gengið er út frá því að velferð barnsins hafi forgang. Það er í fulluFyrirmæli barnaverndarlaga taka af öll tvímæli um tilkynningaskyldu presta að hún gengur framar ákvæðum laga eða siðareglna um þagnarskyldu. Gengið er út frá því að velferð barnsins hafi forgang. Það er í fullu samræmi við hina kristnu siðfræði og mannsskilning sem setur barnið og velferð þess fremst," segir í yfirlýsingunni.

Biskup Íslands, Karl Sigurbjörnsson, hefur sent frá sér yfirlýsingu vegna greinar séra Geirs Waage og birtist í Morgunblaðinu í morgun

Í yfirlýsingunni m.a:

„Samkvæmt starfsmannalögum eru prestar eins og allir opinberir starfsmenn bundnir trúnaði og þagnarskyldu um það sem þeir verða áskynja í starfi og leynt skal fara. En jafn ljóst er að þeim ber að lúta fyrirmælum barnaverndarlaga. samræmi við hina kristnu siðfræði og mannsskilning sem setur barnið og velferð þess fremst," segir í yfirlýsingunni.

Til umhugsunar:

Þetta er vandmeðfarið mál og furðulegt að menn skipi sér í fylkingar  eins og andstæðingar þegar slíkt efni er til umræðu.  Í stað þess að kryfja þetta mál til mergjar og finna á því ásættanlegan flöt þar sem allir geta verið sáttir.

Menn virðast forðast að ræða þetta í dýptina eins og það gefur þó sannarlega tilefni til.

Verður ekki að hlusta á  fólk , sem er komið langt út af réttir braut og fá þar með tækifæri til að leitast við að leiðbeina því og koma til hjálpar bæði því og þeim sem brotið er á.

Ef rjúfa á þagnareiðinn er þessi möguleiki fyrir borð borinn.  Og ef til vil þar með allir möguleikar til að hjálpa og leiðbeina bæði börnum og fullorðum í neyð.